نشر يوم الاثنين، 24 يونيو 2013
نشر بواسطة غير معرف
شهادتى عن أحداث أبو النمرس | حسام السيد
شاهدتى عن أحداث زاوية ابو مسلم من واقع الكلام مع شهود العيان
انا هجكى اليوم بالتفصيل
الساعه 4 أبتدت الأخبار تيجي عن الى بيحصل فى ابو النرس مكنتش لسه متأكد من حاجة على الساعة 5 كانت الدنيا أتأكدت وقررنا اننا هننزل فى البديل عشان نصور الى حصل والى بيحصل .. كلمنا حد من المنطقة ونزلنا عليه ولما وصلنا المكان فى كوبرى فى اول القرية كان عليه حوالى 6 عربيات امن مركزى .. دخلنا القرية وشوفت شاب مشغل فيديو من الى حصل وبيحكى بكل تفاخر عن قتل وسحل الشيعة الى كانو جوا وأتسحلو .. قولناله عايزين نشوف الفيديو وأحكيلنا الى حصل
وكلام الولد كان كالتالى :-
حسن شحاته جه هنا عند الناس الشيعه الموجودين فى البيت الفلانى وكان راكب عجلة ومتنكر وبعديها جه ناس تبعه بردو لابسين عجل ولافين وشهم .. فالبلد مترضاش بحاجة زى دى ده واحد بيسب الرسول والصحابة والدين فالناس راحو ع البيت وعايزين يضربو حسن شحاته ولما وصلو عند البيت وعملو دوشة الناس اصحاب البيت رمو عليهم ميا سخنه من فوق فالناس اتغاظط اكتر قامو حادفين ع البيت ملوتوف وكسرو الباب بتاع البيت ودخلو فأهل البيت ولعو امبوبه عشان يبعدوهم وطلعو الدور التانى من البيت وقفلو عليهم فالاهالى نطو من فوق البيت وكسرو السقف من فوق عليهم ورمو ملتوف جوا الشقة عشان يخرجوهم وبيقولو انهم لما طلعو لقو جريم مش ولابد "شراميط يعنى " وانهم لاقوهم عاملين حفله جنس جماعى وتبادل زوجات وكده "المهم خرج حسن شحاته من البيت قامو نزلو عليه ضرب بالشوم والعصيان وواحد جزار علق خطف فى وشه وفى كتفه وبقو يجروه فى الشارع لحد ما طلع فى الروح وكان فى 3 تانى معاه قتلناهم "
دى كانت شهادة أول واحدقابلته
دخلت عن البيت جوا وطلعت الكاميرا وابتديت اصور اثار تكسير وحرق واجهة البيت والبيت كان ضلمه من جوا فأفتكرت ان مفيش حد دخلت البيت والبيت باين عليه انه بيت ناس بسيطة وعلى قد حالهم أول اوضه على اليمين دى كانت أوضة استقبال ضيوف اعتقد كان فيها بقايا كنبتين بلدى باقى منهم خشب مكسر بعد الأوضه دى فى صاله كان فيها تلاجة مكسورة نصين والباب فى حته والتلاجة فى حته ومرمية بعرض الطريق الأوضه الى فى الوش فيها كرسي بلاستيك وشوية مراتب مرميه فوق بعضها وحيطان البيت كانت مكسره .. سمعت صوت جاى من الدور الى فوق فطلعت لقيت أم الراجل الى كان مستضيف حسن شحاته وبنت صغيرة اعتقدر اخته او واحدة من قرايبة
طبعا كانو منهارين وبينوحو المهم سلمت عليهم وقالولى تقدر تصور الشقة بس محدش هيعمل معاك لقاء ومتصورناش .. دخلت الشقة اول ما دخلت كان فى خرم فى السقف الى المعتدين كسروه وكانو بيحدفو منه ملوتوف والأوضة الى على الشارع كانت اثار الحريق باينه فيها جدا والبلكونة الى فى الأوضة دى مكنتش عارف افتحها من كتر الطوب والخشب المحروق جو البلكونه نطيت ودخلت البلكونه كان فيها كمية طوب وخشب محروق وبقايا ملوتوف مش طبيعية وكان فى صحف محروق وورقة مرمى فى البلكونه .
خرجت ورجعت أتكلمت مع الست شوية وواسيتها وقالتى هيا والبنت الصغير بالنص
هو ايه الى بيحصل نعمل ايه .. هما عايزين يموتونا ليه ؟؟ هو الى مختلف مع حد فى الدين ولا فى المذهب بيقتله ؟ هو فى حد عنده دين يعمل الى حصل ده ؟؟ والبنت الصغيرة قالت هما لو عايزين يهاجمو ديننا دخلو يضربونا ويسرقو حاجتنا ليه أنا دهبي كله اتسرق والموبايلات وكل حاجة .. ولما سألها صحفى كان واقف .. هو أنتو شيعه زى ما الناس بتقول قالتله حتى لو شيعة ده مبرر انهم يعملو فينا كده ؟ ده احنا لو كفرة مش هيعملو معانا كده وبعدين احنا ناس تعرف ربنا وعمر ما حد شاف مننا حاجة وحشة وأسأل اهل المنطقة السنه لو حد شاف مننا حاجة وحشه فى يوم
ومن الواضح من كلامها انها كانت مستخبية ومعرفتش حجم الكارثة والقتلى الى حصل فقالتلى " والله لو اهلى جرالهم حاجة أٌقسم بالله وبعدين سكتت شوية وبنبرة منكسر قالتلى هعمل ايه هكشف شعرى وادعى عليهم واحد واحد "
ده كان مجمل كلامى معاهم
المهم عشان نختصر انا هحكى الحاية الى انا جمعتها من روايات كل الشهود
حسن شحاته القيادى الشيعي هو من أهل المنطقة من زمان بس ساب المنطقة من زمان وعايش فى الشرقية ... وكان جاى يزور قرايبه واصدقائة الموجودين فى المنطقة . وصل المنطقة والناس الشيعة اصحاب البيت أستقبلوه بالزغاريد .. قبل الموضوع ده بحوالى شهر كل الجوامع المعروف ان تيار الاسلام السياسي مسيطر عليها كانت بتهاجم الشيعة والناس فى المنطقة قالولى ان الشيوخ هنا بيقولولنا دول كفرة ولازم يتعاقبو وانهم مكرسين حياتهم لشيطنة الشيعة وللعلم المنطقة فيها نسبه شيعة كبيرة مش بس البيت ده ومن الملاحظ ان نبرة التحريض ابتدت تعلى اوى بعد خطاب العريفى ومؤتمر الأستاد .
المهم أهل المنطقة فى فيديو متداول بينهم على الموبايلات لحسن شحاته وهو فى مقام السيدة زينب وحواليه مجموعة من شباب القرية فى المولد الى فات والشباب بيبوسو ايده ويتمسحو فيه .. الفيديو ده كان مضايقهم جدا مش فاهم ليه وده كان سبب الأحداث النهاردة لما شافو حسن شحاته داخل البيت انتشرت اشاعه ان فى حسينية بتتعمل فى البيت ده ولما سألت الناس يعنى ايه حسينية نص قال معرفش والله والنص التانى كان افتائات منهم واحد قالي دى زى الناس الى بيغزو نفسهم بالسنج وينادو ع الحسين
المهم الأخوان والسلفين بتوع المنطقة اتجمعو بأعداد قليلة قدام بيت الرجال " الشحات " ده اسم صاحب البيت الشيعى وكانو بيطالبو بطرد حسن شحاته من المنطقة طبعا الراجل رفض فحصلت مشادات فرجاله البيت خرجو جروهم من الشارع وبعد فتره رجعو ومعاهم كم كبير من اهالى البلد فأهل البيت اتخضو فحاولو يدافعو عن نفسهم ورمو عليهم ميا سخنه وشطه من فوق .. وولعو انبوبه بوتجاز عشان يخوفو الناس وبعدها طلعو استخبو فى الدور الى فوق فالمعتدين طلعو فوق سطح البيت وكسرو فتحة فى سقف الشقه الى هما قاعدين فيها وحدفو ملوتوف فيها فالى جو الشقه طلعه جرى منها وكان فى ستات مستخبيين فى اوضه جوا والاطفال .. الرجاله خرجو بره البيت فمسكوهم المعتدين 4 ماتو فى اديهم كلهم من الضيوف الى جايين لاهل البيت من اصل 7 ضيوف وصاحب البيت ومراته وعيال مصابين اصابات جامده واتنقلو المستشفى .
أما عن دور جهاز الشرطة كان بيقوم بدور المتفرج والحانوتى .. كان فى تشكيل امن مركزى كبير وكان يقدر يخلص الموضوع فى ثوانى ورغم ان الاعتداء استمر ما يقارب لل 7 ساعات الا انهم متدخلوش ومضربوش قنبلة غاز واحدة وكلام اهل القرية ان قائد القوة كان بيقولهم خليهم يولعو فى بعض .وكانو مستكفيين انهم بيستنو الى يخرج من البيت الأهالى يخلصو عليه فياخدو جثته فى عربية الترحيلات وينقلوه على المستشفى .
وبعد ما القصة خلصت .. الناس لقت أن الموضوع بيكبر ومش هيسكت على كده ف جه دور الأشاعات بقى
وكانت الأشاعة الى اصابتنى بصدمة عصبيه أن الأهالى لما دخلو البيت لقو شراميط بينام معاهم الشيخ حسن شحاته واطفال صغيرة بيعمل معاهم حاجات وحشه وان كان فى تبادل زوجات وحفله جنس جماعى كل ده أفترا طبعا لأن الناس مدخلوش البيت غير فى نهاية الخناقة يعنى محدش منهم دخل شاف ايه الى بيحصل جوا
بالأضافه أن المعتدين كانو زعلانين جدا انهم كانو جايبين اكل يكفيهم لمده شهر و3 أطباق حلويات وبيتكلمو على الحاجات دى كأنها أحراز لقوها فى البيت مثلا .
طبعا الأشاعة دى تم أطلقها بمعرفة ولاد الوسخة فى القرية لمنع التعاطف مع الناس دى وانا لما سألت جيرانهم قالولى الحق يتقال الكلام ده غلط والناس دى عمرنا ما شوفنا منهم حاجة وحشة خالص وناس محترمة .
ومن كلام الناس عرفت ان المشاركين فى الحرق والقتل أما مجموعة من الشباب الصغير الى اعمارهم لا تتعدى ال 16 و 17 سنه والى شايفيين ان ده كان لازم يحصل عشان الشيخ قالنا ان الشيعه خطر بيهددنا وبيهدد الاسلام وامن مصر والجزء التانى هما مجموعة من البلطجية المعروفين فى المنطقة ببيع المخدرات والبرشام واعمال البلطجة
وكل الناس الكبار بتوع المنطقه استنكرو الى حصل وشايفين ان الاخوان والسلفيين هما السبب وان الشيعه طول عمرهم عايشين بينهم بسلام والى حصل ده جريمة
و السلفيين والاخوان لما لقو الموضوع كبر وفى قتل رفعو اديهم وخلعو وأبتدو يقومو بدور المسلكاتى
ودى شهادتى عن الأحداث ولو حد عايز يسأل على حاجة معينه يتفضل
وفى النهاية أحب أقول أن الى حصل فى ابو النمرس النهاردة كربلاء جديدة
لعن الله يزيد هذا الزمان
