نشر يوم الاثنين، 10 مارس 2014
نشر بواسطة هشام الصباحي
حضرتك عاوز ضريبه على إيه ..؟
حضرتك عاوز ضريبه على إيه ..؟
عاوز ضريبه للبعد عن الأب !
عن الأم ! عن الأخ ! عن الصاحب ! عن الحبيبة !
حضرتك عاوز ضريبه للبعد عن أهلي وبلدي وعزوتي وضحكتي ورواقة بالي ..!!
حضرتك عاوز ضريبه على إيه ..؟
على معاملتي في بلدي على إني من السياح ..!
ولا معاملتي في غربتي على إني عابر سبيل ..!
حضرتك عاوز ضريبه على رميتي في اي مستشفى أيام وأسابيع لوحدي ، بدون مايكون جنبي واحد من أهلي ..!
حضرتك عاوز ضريبه على إيه ..؟
عالشقى ..! عالمذلة ..! عالمهانة ..! عالبهدلة ..! عالمرمطة ..!
حضرتك عاوز ضريبة على إيه ..؟
عالمرض اللي لازم يكلبش في جتة كل مغترب مع تأشيرة الدخول .. وميخرجش منه قبل ماتخرج روحه الأول ..!
حضرتك تعرف ممكن كام فرد يقعد في أوضه واحده ..!
وبيقى عايش عيشة الحيوانات .. ومضحي بمعظم متع الدنيا ومعتبرها رفاهية (ومعظمها اساسية زي لقمه نضيفه عالاقل ) ..!
وبيعمل كل ده ومتنازل عن كل ده ..
لمجرد إنه يقدر يوفر قرشين .. يبعتهم لأهله آخر الشهر .. يستروا بيهم نفسهم قدام الناس .. ويكفيهم شر السؤال من اللي يسوى واللي ميسواش ..!!
حضرتك تعرف أي حاجه من دي ..!!!!!!!!
طب حضرتك تعرف إن معظم اللي بيموت في غربته بيتدفن فيها ..!!
بيتدفن غريب في بلد غريبه .. من غير مايفضل لأهله أي حاجه من ريحته ..
ولو حتى تربة تلم عضمه .. لما يوحشهم يزوروه فيها ..!!
عموماً ..
مش لازم حضرتك تكون عارف أي حاجه من دي خالص ...
يكفي إن سيادتك ترضى علينا .. وتتنهد .. وتتنحنح .. وتسبلّنا بعنيك ............ وتحلم ..
وأحلام سيادتك أوامر يافندم .. أحلام سيادتك أوامر ..
وكله #علشانك_يامصر
منقول من Ahmed nassr
