نشر يوم الجمعة، 1 نوفمبر 2013
نشر بواسطة هشام الصباحي
شهادة باسل رمسيس عن منع باسم يوسف
عن منع حلقة باسم يوسف.. هاقول رأيي وعليه العوض: قريت النهاردة في بيان سياسي تافه الجملة دي "نظام السيسي أصدر اليوم تصريحآ على لسان الببلاوي".. ليه البيان تافه؟؟ لأسباب كتيرة جدا.. من ضمنها اللي يخص الجملة دي. الأنظمة بكل أشكالها مابتدارش بالشكل ده.. بما فيها الأنظمة الفاشية. يعني السيسي مابيجيبش الببلاوي قدامه ويوقفه زي التلميذ ويقوله طلع تصريح يقول كذا. ده غير أن النظام في مصر دلوقتي عبارة عن كتل متصارعة.. مهياش كتلة واحدة. بتهيأللي أن المنع ماتمش ولا بأمر السيسي ولا بأمر أي حد من الحكومة زي ما ناس كتيرة بدأت تقول. القرار غالبا من القناة نفسها.. لأن بعض الخدامين.. اللي بيمسحوا بلاط السلطان.. بيبقوا أوسخ وأحقر منه. وبيعملوا حاجات هو أصلا مطلبهاش، ولا عايزها. غالبا المشهد الجديد من المسرحية دي هايكون أن السيسي يعبر عن اعجابه بباسم يوسف ويرجع، ولو علي قناة تانية. وكدة يكون كله مبسوط.. إحنا والسيسي والخدامين كمان.. لأنهم بينوا أن "الصنم" اللي بيصنعوه، اللي هو الجنرال، بيثبت أنه راجل عظيم وديمقراطي. القنوات القذرة دي.. المفروض إنها من ضمن النظام اللي عايزين نسقطه. نظام عفن لدرجة أنه مش قادر يستحمل ساعة سخرية. والمشكلة الحقيقية إنها سخرية بوعي وذكاء.
