نشر يوم الاثنين، 25 مارس 2013
نشر بواسطة غير معرف
خف شوية | محمد فتحى
خف شوية
هو صديقي
صحيح من فترة قريبة لكن بسرعة توطدت علاقتنا وأصبح بيننا عيش وملح
صحيح نختلف أحياناً، بل كثيراً، لكنه مصر اني زي اخوه الصغير وانه أخوه الكبير وأنا أعتز بهذه الصداقة والأخوة مهما حدث
وهو في نفس الوقت عليم ببواطن الأمور زي ما بيقولوا
قريب من دواير صنع القرار بتاعة دلوقت رغم انه ماكانش كده زمان، ورغم انه ماخططش يبقى كده دلوقت
قريب جداً من الرئاسة
من شويتين تلاتة كنت بكلمه فلقيته بيقول لي : ابن حلال.. كنت لسة هكلمك
خير؟؟
قال لي بالنص : خف شوية !!!
خف شوية؟؟
ياااااااااااااااااااااه...
أنا سمعت الكلمة دي من امي وابويا أيام حسني مبارك بالظبط وماحصليش حاجة..يا دوب استدعاء في أمن الدولة وكام تهديد ماحطتهمش ف بالي أصلاً، ولا زيطت بيهم عشان اعمل بطل لأني مدرك فعلاً اني مش بطل
وفاكر اني قلت لظابط أمن الدولة في اليوم ده، وكان اسمه ابراهيم، انتو غلابة جداً يا باشا.. مش فاضيين لشغلكم وعمالين تعملوا مننا أبطال، وانا شخصياً لو مروحتش خلال ساعتين مراتي عارفة هتعمل إيه وهبقى بطل من ولا حاجة وانتو هتتجازوا
فالراجل يا عيني حلف ان العربية بتاعتهم توصلني لأي حتة انا عايزها
وانا حلفت ان آخره معايا محطة المترو عشان ما اتشبهش :)
خف شوية؟؟
يااااااااااااااااااااااااه
فاكر برضه مراتي وهي بتقولهالي بعد الثورة ، وأيام المجلس العسكري
ومكالمات حمايا ليا
وبرضه أبويا وأمي
والكل بيقول لي : خلي بالك.. الجيش مابيرحمش.. خف شوية عشان بيشدوا في الناس
وانا كان ردي هو هو
هما مش أغبيا عشان يعملوا معايا كده.. هيعملوا مني بطل ع الفاضي.. أنا مش مؤثر للدرجة اللي تقلقهم مني ، ولو عايزين يجيبوا حد كانوا جابو أسماء كبيرة
وبعدين ما انا جاي جاي
هدفع التمن في يوم من الايام واخد نصيبي من الضرب أو السحل أو تلفيق القضايا أو التهديد
وممكن خرطوشة ، وممكن تطيرلي عين، وممكن اخد رصاصة طايشة..
عادي يعني
ده انا هبقى مبسوط ساعتها وفرحان ولما اقف قدام ربنا ان شاء الله هعرف ارد عليه.. انما غيري هيتلجلج ووارد جداً مايعرفش يرد
خف شوية؟؟
ياااااااااااااااااه
أنا فاكر برضه ان الكلمة دي اتقالتلي قريب
حد قال لي انت مرصود من الإخوان
مرصود؟؟ مرصود مين يا عم انت.. هو انا مهم كده للدرجة دي؟؟
وبعدين هما الإخوان أغبيا عشان يعملوا مني بطل
وعند الجملة الأخرانية دي انفجرت في الضحك..
لأني عارف فعلاً انهم بيتصرفوا أحياناً بغباء وممكن يعملوها :)
والغريب اني عندي اصدقاء من الإخوان وعلاقتنا محترمة وفيها محبة غريبة بعيداً عن الخلاف السياسي وواكلين برضه مع بعض عيش وملح
بس عادي يعني
بتحصل في أحسن العائلات
خف شوية؟؟
يااااااااااااااه
الكلمة دي لسة متقالالي من حوالي شهر
واللي قالهالي قال لي: الحيش زعلان منك
وانا اعتبرته بيهرج على أساس ان جيش مين ده اللي هيفكر يكلمني والا يهتم بمقال كتبته
بس الغريب ان بعدها صديق وأخ عزيز جداً ومطلع جداً برضه قال لي : الجيش فاكرك إخوان؟؟
مين يا عم اللي إخوان؟؟
أنا؟؟؟؟؟؟؟؟؟؟؟؟
قال لي آه، وشايفين ان المقالة اللي انت كتبتها بتاعة هات اللي عليك يا سيسي مدفوعة من الإخوان وف توقيت حرج وانت بقيت تحت المنظار
لااا ياااا راااااجل..
يعمي في الآخر هيطلع مرسي هو اللي مشغلني؟؟؟
ماشي
المهم ان صديقي الذي بدأت به المقال ها هو يقول لي منذ قليل
خف شوية.
يااااااااه..
ليه يا صديقي
قالها لي بلهجة العالم ببواطن الأمور
خلاص .. فيه ناس كتير هتيجي في الرجلين.. ده أكيد
ليه يا عم؟؟؟
قال لك هما جابوا آخرهم
وبيقلبوا ف ملفات الضرايب بتاعة الكل
والكسب غير المشروع هيلم الكل ، ومنهم ناس عندك في الوطن
ده غير ابراهيم عيسى
ده غير وغير وغير وغير
وساعتها هتفتكر كلامي ده
قلت لصديقي: ده تخمين والا يقين؟؟
رد: دي معلومات
خف شوية عشان دورك قرب
ابتسمت وانا أقول له: أنا؟؟؟؟؟؟؟؟؟؟؟؟
وهيعملوا مني بطل؟؟؟
ولو قامت ثورة عليهم ، وهتقوم بالمناسبة ان لم يكن دلوقت هيبقى بعدين، هبقى انا من زعمائها لأني اتسجنت واتشديت أيام الإخوان وكده؟؟
وهيساووني ساعة ما الثورة تقوم ضد الإخوان بالفلول اللي ضدهم من قبل ما ييجوا؟؟؟؟
أنا؟؟؟؟؟؟؟؟؟؟؟؟؟
يا سيدي مش هخف
العمر واحد والرب واحد
آه صحيح هيصعب عليا ان اللي هيعمله الإخوان لا عمله مبارك ولا عمله المجلس العسكري
انما عادي.. أهي بطولة مجانية تجيلي لغاية عندي .. هقول لها لأ..
وبعدين أهي تبقى فرصة الجيش يعرف اني مش إخوان :)
والفلول يفتكروني منهم :)
ونقب بقى على وش الدنيا على اعتبار ان أي ثورة جاية هيعملها الجيش أو الفلول
مش هخف لا شوية ولا شويتين
أكتب ما أقف به فخوراً أمام الله عز وجل
لا أبحث عن بطولات لكن أرحب بها إذا أتتني لغاية عندي (هععع)
أنتظر أن أدفع ثمناً يجب أن أدفعه لأنه ضريبة حب وطن أشبه بكاس داير على كثير من الشرفاء الذين سأشرف أن أكون منهم
سأخرج من التجربة - إن حدثت، وإن خرجت- بكتاب حلو أنشره
وأبنائي سيقال عن أبيهم ولاد المناضل، ويستمر النضال في عيال تكبر وهي بتكره اللي سجن ابوهم عشان بيقول رأيه
وإن لم أخرج ، ستتحقق أيضاً نفس النتيجة ، وربما أصير رمزاً
وإن لم يحدث شئ من كل هذا سيثبت هذا صحة كلامي
ومش هخف شوية
